SERE VOU-AU TAVORAKI-MATASERE-WAIKATAKATA VURE E DELA NI NUKU VULA
Written by Mika Qalobula on February 29, 2024
MACIU SALAUCA-Na turaga ka i liuliu ni matasere rogo e na noda vanua na “Waikatakata Vure E Dela Ni Nuku Vula”,ka levu sara na nona sere e dau vakatagitaki tiko yani e na nomuni sala ni kakaburaki na Viti Fm .E levu sara na sere e ratou sa katona na matasere oqo me vaka na “Sau Koula” kei na so tale, ia e dua tale na nodratou sere vou oqo ka yacana tiko “Au Tavoraki”, ka vola na sere oqo ko Maciu Salauca , ka katoni e na volau ni katokatoni na Raven Studio.
AU TAVORAKI-Na sere me baleta na nodrau bula ni veikilai e rua na veiwatini, ni oti mai e vica na yabaki ni vakawati , ka yacova na gauna me yavalata na meca ke vakavuna me karusa sara kina na yavu ni nodrau veidomoni.E vakatoka oqo e dua na yatuvosa e na qaqa ni sere oqo “Ni yaloyalo oqo sa lai maumau walega na vosa yalayala e matai talatala, ni vaka walega na i sulumadra”, ka vakaibalebaletaka tiko ni sa yali na kena talei se rokovi na vakamau se vakawati oya.
E na balavu ni gauna vinaka kei na marau, ka rau bula taka mai, e na yaco na siga se gauna e na cava kina, ka vakaibalebaletaka tiko e na kau se senikau e da tea, e dau tubu, vakadrauna ka se sara me yacova na gauna e na malai ka luca yani me vaka ni ka kece e na bula oqo e vaka i cavacava ga.
E qai mosita na yalona, ni titobu ni veikilai oqo, e yaco madaga vaka kina me sa sulina, ka kena i balebale ni rau sa vakaluveni se sa vakatubukawa tu ,ka qai mositi koya sara kina vakalevu, ni wekadrau madaga e ra sa veikilai tu , ka
sa yaco na veibiu.Na marau ka sa lai vuki tale me rarawa.
E sa qai tu vakatagane na cauravou me ciqoma ni sa nona vakatulewa ga o vunimarama me sa gole.
Ni tagi tu na yalona e na levu ni lomatarotaro se cava na vuna e yaco kina na veitawasei oqo, ka vakaibalebaletaki tiko e na sere oqo ni kena kaukauwa e vaka ga na gunu wai ni duva, ka da kila ni dau duvani na ika, e ra dau gogo ka rawa ni ra mate saraga .Sa qai yalataka e lomana ni oti na mosi ni veika oqo, ni sa na tu me na kinoca na wai ni matana, e sa na maroroya kece na cala se na i rogorogo kei vuni marama, ka yacova sara e na dua na yakavi ni sa lai dromu toka na siga, me sa na vakamoce na yalona vei nona daulomani se ko nona senikau.
VITI FM:92.2/92.0/92.6 FM-E-KAMICA-QAI-KAJI.
I VUREVURE-MACIU SALAUCA
